សម្តេចធិបតី ហ៊ុន ម៉ាណែត៖ ការដាក់សម្ពោធមន្ទីរពេទ្យជាតិធំជាងគេរបស់កម្ពុជា នៅពេលនេះ ជាមោទនភាពរបស់យើងទាំងអស់គ្នា
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានការរៀបចំមន្ទីរពេទ្យជាតិ តេជោសន្តិភាព ដែលជាពេទ្យធំជាងគេនៅកម្ពុជានេះ គឺជាការគិតគូរយូរអង្វែង ហើយសម្រាលបន្ទុកមន្ទីរពេទ្យផ្សេងៗ។ ការដាក់សម្ពោធមន្ទីរពេទ្យជាតិ តេជោសន្តិភាព នៅពេលនេះ ជាមោទនភាពរបស់យើងទាំងអស់គ្នា។
សម្តេចធិបតី ហ៊ុន ម៉ាណែត មានប្រសាសន៍បែបនេះក្នុងឱកាសដែលសម្តេច បានអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់ជាផ្លូវការ «មន្ទីរពេទ្យជាតិ តេជោសន្តិភាព» និងប្រកាសដាក់ឱ្យអនុវត្តជាផ្លូវការនូវកម្មវិធីទី១ នៃគោលនយោបាយជាអាទិភាពទាំង៦ គឺ «ការពង្រីក វិសាលភាពមូលនិធិសមធម៌ដល់គ្រួសារងាយរងហានិភ័យ» នាព្រឹកថ្ងៃទី២៤ ខែតុលា ឆ្នាំ២០២៣។
ជាមួយគ្នានេះ សម្តេចធិបតី ក៏បានរំលឹកពីវិបត្តិកូវីដ ដែលបានកើតឡើងក្នុងទ្រង់ទ្រាយធំ កាចសាហាវព្រមៗគ្នា ដែលធ្វឱ្យគ្រប់ប្រទេសទាំងអស់ មិនបានត្រៀមខ្លួនទាន់ពេលវេលា។
សម្តេចធិបតី ហ៊ុន ម៉ាណែត មានប្រសាសន៍បន្តទៀតថា មន្ទីរពេទ្យជាតិ តេជោសន្តិភាព គឺសម្រាប់ប្រជាជនទូទាំងប្រទេស មិនមែនសម្រាប់តែប្រជាជនដែលរស់នៅទីក្រុងភ្នំពេញនោះទេ។
សម្តេចធិបតី បានបន្ថែមថា ធនធានមនុស្សជាកត្តាសំខាន់ សម្រាប់អភិវឌ្ឍប្រទេសជាតិ បើគ្មានធនធានមនុស្ស ដំណើរការអ្វីក៏មិនអាចធ្វើបានដែរ ៕
