ចាប់ខ្លួនក្មេងទំនើង ៣នាក់ ក្រោយធ្វើសកម្មភាព យកដុំថ្មគប់ លើជនរងគ្រោះកំពុងជិះម៉ូតូ បណ្ដាលឲ្យដួលស្លាប់ម្នាក់ និងរបួសធ្ងន់ម្នាក់ នៅស្រុកម៉ាឡៃ
ភ្នំពេញ៖ សមត្ថកិច្ចនគរបាល នៃអធិការដ្ឋាន ស្រុកម៉ាឡៃ សហការជាមួយនគរបាលប៉ុស្តិ៍រដ្ឋបាល បានឃាត់ខ្លួនក្មេងទំនើង ៣ នាក់ ករណីប្រើដុំ ថ្មគប់ ទៅលើជនរងគ្រោះ កំពុងជិះម៉ូតូ ឱ្យដួលស្លាប់ម្នាក់ និងរបួសធ្ងន់ម្នាក់ នៅភូមិស្វាយព្រៃ ឃុំស្រឡៅ ស្រុកម៉ាឡៃ ហើយនៅថ្ងៃទី ២២ ខែតុលា ឆ្នាំ២០២៣ បានបញ្ជូនទៅការិយាល័យព្រហ្មទ័ណ្ឌ ស្នងការដ្ឋាននគរបាលខេត្ត ដើម្បីកសាងសំណុំ រឿង បញ្ជូនក្មេងទំនើង ៣ នាក់នេះ ទៅសាលាដំបូងខេត្ត ដើម្បីចាត់ការបន្ត។
លោកវរសេនីយ៍ឯក បេន សំអាត អធិការនគរបាលស្រុកម៉ាឡៃ បានប្រាប់ថា ជនសង្ស័យជាក្មេងប្រុសទំនើង ចំនួន៣ នាក់ ដែលបានត្រូវឃាត់ខ្លួននោះ មានៈ ១.ឈ្មោះ វេត បូរី អាយុ១៥ឆ្នាំ , ២.ឈ្មោះ សៅ ទីងសែង អាយុ១៦ឆ្នាំ និង៣.ឈ្មោះ សំ ផុង អាយុ១៤ឆ្នាំ រស់នៅភូមិសង្កែ ឃុំបឹងបេង ស្រុកម៉ាឡៃ ខេត្តបន្ទាយមានជ័យ។
លោកបានបញ្ជាក់ថា កាលពីរសៀល ថ្ងៃទី ២០ ខែតុលា ឆ្នាំ២០២៣ នៅចំណុចភូមិ ស្វាយព្រៃ ឃុំស្រឡៅ ស្រុកម៉ាឡៃ មានក្មេងទំនើងមួយក្រម មានគ្នា ៣ នាក់ ជិះម៉ូតូ ១គ្រឿង ម៉ាកហុងដា ឌ្រីម ពាក់ផ្លាកលេខ បន្ទាយមានជ័យ 1S.4305 បានឈប់លើ ដងផ្លូវ ហើយយកដុំថ្មគប់ទៅលើជនរងគ្រោះ ២ នាក់ ដែលកំពុងជិះម៉ូតូម៉ាកហុងដា ឌ្រីម គ្មានផ្លាកលេខ បណ្ដាលឱ្យជនរងគ្រោះ បានដួលបោកក្បាល លើដងផ្លូវ គឺ១-ឈ្មោះ ដា ភេទប្រុស អាយុ១៨ឆ្នាំ ចំក្បាលផ្នែកខាងក្រោយ ស្លាប់ភ្លាមៗ នៅកន្លែងកើតហេតុ និង ២-ឈ្មោះ ប៉ាវ ពិសី ភេទប្រុស អាយុ១៥ឆ្នាំ ចំក្បាល ទ្រូង បណ្តាលឱ្យរងរបួសធ្ងន់ ។ ជនរងគ្រោះទាំង២នាក់ រស់នៅភូមិកោះស្នួល ឃុំទួលពង្រ ស្រុកម៉ាឡៃ។
ក្រោយទទួលព័ត៌មាននោះ កម្លាំងនគរបាលជំនាញនៃអធិការដ្ឋានស្រុកម៉ាឡៃ សហការជាមួយសមត្ថកិច្ចនគរបាលប៉ុស្តិ៍រដ្ឋបាល បានស្រាវជ្រាវ ឃាត់ខ្លួនជនសង្ស័យ ជាក្មេងទំនើងបាន ៣ នាក់ និងម៉ូតូ ១គ្រឿង ដែលជាមធ្យោបាយ សម្រាប់ប្រព្រឹត្តបទ ល្មើស ហើយបាននាំយកទៅសាកសួរចម្លើយ។
ជនដៃដល់ និងបក្ខពួក បានសារភាពថា ពួកគេ បានរៀបគម្រោង និងតាមដានជនរង គ្រោះ ហើយបានសងសឹក ដូចបំណង គឺគប់ដុំថ្ម ឱ្យជនរងគ្រោះ ស្លាប់ និងរងរបួស ដូច្នេះ ។ ពួកគេ បានបន្តថា តាមពិត ជនរងគ្រោះ ពីមុន ជាជនបង្កទេ ។ ព្រោះពួកខ្លួន មានទំនាស់ គំនុំជ្រាលជ្រៅណាស់ ជាមួយគ្នា រឿងហាមមើលមុខនិងធ្វើសកម្មភាព ឌីដង នៅទឺកដី (ភូមិ) របស់ខ្លួន ហើយក៏ទាក់ទងនឹងទំនាក់ទំនងស្នេហានឹងនារី ដែលពួកខ្លួន បានតាំងចិត្តស្រឡាញ់ផងដែរ ។
ក្រោយនគរបាលការិយាល័យព្រហ្មទ័ណ្ឌកម្រិតធ្ងន់ នៃស្នងការដ្ឋាននគរបាល ខេត្តបន្ទាយមានជ័យ ទទួលសំណុំរឿងនេះ ក៏បានសាកសួរចម្លើយបន្ថែម ហើយ ត្រូវបានកសាងសំណុំរឿង បញ្ជូនទៅសាលាដំបូងខេត្ត នាថ្ងៃទី ២២ ខែតុកា ដើម្បីអនុវត្តតាមនីតិវិធី ៕
