នាយឧត្តមសេនីយ៍ សេង យូអ៊ាន់ អញ្ជើញដឹកនាំកិច្ចប្រជុំ ជាមួយគណៈប្រតិភូ ក្រសួងសន្តិសុខសាធារណៈនៃសាធារណរដ្ឋប្រជាធិបតេយ្យប្រជាមានិតឡាវ

ភ្នំពេញ៖ នៅទីស្តីការក្រសួងមហាផ្ទៃ នាព្រឹកថ្ងៃ ទី០៣ ខែតុលា ឆ្នាំ២០២៣ ឯកឧត្តម នាយឧត្តមសេនីយ៍ សេង យូអ៊ាន់ អគ្គនាយក នៃអគ្គនាយកដ្ឋានភស្តុភារ និងហិរញ្ញវត្ថុ ក្រសួងមហាផ្ទៃ អញ្ជើញដឹកនាំកិច្ចប្រជុំផ្លាស់ប្តូរបទពិសោធន៍ការងារជាមួយគណៈប្រតិភូអគ្គនាយកដ្ឋានភស្តុភារ ក្រសួងសន្តិសុខសាធារណៈ នៃសាធារណរដ្ឋប្រជាធិបតេយ្យប្រជាមានិតឡាវ ដោយមានការអញ្ជើញចូលរួមពី ឯកឧត្ដម អគ្គនាយករង ប្រធាននាយកដ្ឋាន អនុប្រធាននាយកដ្ឋានព្រមទាំងមន្ត្រីពាក់ព័ន្ធជាច្រើនរូប។

ជាកិច្ចចាប់ផ្តើម ឯកឧត្តម នាយឧត្តមសេនីយ៍ សេង យូអ៊ាន់ អគ្គនាយក នៃអគ្គនាយកដ្ឋានភស្តុភារ និងហិរញ្ញវត្ថុ មានប្រសាសន៍ស្វាគមន៍ និងសម្តែងនូវសេចក្តីសោមនស្សរីករាយ ចំពោះវត្តមានគណៈប្រតិភូ អគ្គនាយកដ្ឋានភស្តុភារ ក្រសួងសន្តិសុខសាធារណៈ នៃសាធារណរដ្ឋប្រជាធិបតេយ្យប្រជាមានិតឡាវ ដែលបានអញ្ជើញមកបំពេញទស្សនកិច្ចផ្លូវការ ដើម្បីផ្លាស់ប្ដូរបទពិសោធន៍លើការងារជំនាញ ក្នុងក្របខណ្ឌនៃការអនុវត្តកិច្ចសហប្រតិបត្តិការរវាងក្រសួងមហាផ្ទៃ នៃព្រះរាជាណាចក្រកម្ពុជា និងក្រសួងសន្តិសុខសាធារណៈនៃសាធារណរដ្ឋប្រជាធិបតេយ្យប្រជាមានិតឡាវ ប្រចាំឆ្នាំ២០២៣។

ឯកឧត្តម នាយឧត្តមសេនីយ៍ មានប្រសាសន៍បន្តថា នេះជាលើកទីពីរហើយ ដែលអគ្គនាយកដ្ឋានភស្តុភារ និងហិរញ្ញវត្ថុ ក្រសួងមហាផ្ទៃ នៃព្រះរាជាណាចក្រកម្ពុជា បានសហការទទួលមិត្តឡាវ ដើម្បីផ្លាស់ប្ដូរបទពិសោធន៍ជាមួយគ្នា ដោយកាលពីលើកទីមួយគឺបានរៀបចំឡើងក្នុងឆ្នាំ២០១៩។

ក្នុងឱកាសនោះដែរ ឯកឧត្តម នាយឧត្តមសេនីយ៍ មានប្រសាសន៍លើកឡើងថា ក្នុងដំណើរទស្សនកិច្ចផ្លាស់ប្ដូរបទពិសោធន៍ លើកនេះ ក៏ជាឱកាសដ៏វិសេសវិសាល ដើម្បីទទួលបានបទពិសោធន៍ល្អៗបន្ថែមទៀត ដើម្បីជាមូលដ្ឋានសម្រាប់កែតម្រង់ជាមួយការងារជាក់ស្ដែង ធានាឲ្យការផ្គត់ផ្គង់ការងារ ភស្តុភារហិរញ្ញវត្ថុកាន់តែល្អប្រសើរ រួមចំណែកអនុវត្តផែនការកិច្ចសហប្រតិបត្តិការ របស់ក្រសួងទាំងពីរ ឱ្យទទួលបានលទ្ធផលជាវិជ្ជមាន និងរីកចម្រើនជាយូរអង្វែងតទៅ ព្រមទាំងបន្តពង្រឹង និងពង្រីកចំណងសាមគ្គីភាព និងកិច្ចសហប្រតិបត្តិការរវាងអង្គភាពទាំងពីរ៕