សាខាកាកបាទក្រហមកម្ពុជាខេត្តព្រៃវែង បើកកិច្ចប្រជុំវិសាមញ្ញស្តីពីការកែសម្រួលសមាសភាពគណៈកិត្តិយស និង គណៈកម្មាធិការ ដើម្បីបន្តអាណត្តិទី៥
ភ្នំពេញ៖ នៅថ្ងៃទី២ ខែតុលា ឆ្នាំ២០២៣ សាខាកាកបាទក្រហមកម្ពុជា ខេត្តព្រៃវែង បានបើកកិច្ចប្រជុំវិសាមញ្ញស្តីពីការកែសម្រួលសមាសភាពគណៈកិត្តិយស និង គណៈកម្មាធិការ សាខាកាកបាទក្រហមកម្ពុជា ខេត្តព្រៃវែង ដើម្បីបន្តអាណត្តិទី៥ (២០១៩-២០២៥) ក្រោមអធិបតីភាព ឯកឧត្តម សុខ ផេង ប្រធានស្តីទីគណៈកម្មាធិការសាខា ដែលមានការអញ្ជើញចូលរួមពីសមាជិក សមាជិកា គណៈកម្មាធិការ និងក្រុមប្រតិបត្តិសាខា សរុបមានអ្នកចូលរួមចំនួន ១៤រូប ស្រី ៤រូប នៅសាលប្រជុំសាខាកាកបាទក្រហមកម្ពុជា ខេត្តព្រៃវែង។
មានប្រសាសន៍ក្នុងពិធីនេះ ឯកឧត្តមប្រធានស្តីទី សម្តែងការស្វាគមន៍យ៉ាងកក់ក្តៅចំពោះវត្តមាន ឯកឧត្តម លោកឧកញ៉ា គណៈកម្មាធិការសាខា និងលោក លោកស្រី មន្ត្រីក្រុមប្រតិបត្តិ ដែលអញ្ជើញចូលរួមកិច្ចប្រជុំរសៀលនេះ និងសូមសំដែងការអរគុណចំពោះឯកឧត្តម លោកឧកញ៉ា សមាជិក សមាជិកា នៃកិច្ចប្រជុំ ដែលបានដឹកនាំ និងចូលរួមកិច្ចការងារមនុស្សធម៌កន្លងមក។
ឯកឧត្តមប្រធានស្តីទី ក៍បានពាំនាំនូវប្រសាសន៍ផ្តាំផ្ញើសាកសួរសុខទុក្ខដល់ សមាជិក សមាជិកានៃអង្គប្រជុំ ពីសំណាក់ឯកឧត្តម សន្តិបណ្ឌិត នេត សាវឿន ឧបនាយករដ្ឋមន្ត្រី និងជាប្រធានកិត្តិយសសាខា។
កិច្ចចាប់ផ្តើមនៃកិច្ចប្រជុំ ឯកឧត្តមប្រធានស្តីទី សូមស្នើឲ្យសមាជិក សមាជិកា នៃអង្គប្រជុំត្រូវមានស្មារតីទទួលខុសត្រូវខ្ពស់ ក្នុងការពិភាក្សាជ្រើសរើសប្រធានគណៈកិត្តិយស និងអនុប្រធាន ព្រមទាំងប្រធានគណៈកម្មាធិការថ្មី ដើម្បីបន្តនិរន្តរភាព ការដឹកនាំការងារសាខាឲ្យមានប្រសិទ្ធភាព និងប្រសិទ្ធផល។ យោងលក្ខន្តិកៈ វិធាននៃនីតិក្រម បទប្បញ្ញតិ្ត ហិរញ្ញវត្ថុ កាកបាទក្រហមកម្ពុជា ផ្នែកទី៦ សាខា វិធានទី៤០ ការផ្លាស់ប្តូរវេន និងកម្រងប្រវត្តិ ចំណុច ៤០.៣ ក្នុងករណីមានការផ្លាស់ប្តូរប្រធាន ឬអនុប្រធាន មុនផុតអាណត្តិ សាខាត្រូវកោះប្រជុំវិសាមញ្ញក្នុងរយៈពេល យ៉ាងយូរ ៣០(សាមសិប)ថ្ងៃ ដើម្បីបោះឆ្នោតជ្រើសតាំងប្រធាន ឬអនុប្រធានថ្មី និងសុំការទទួលស្គាល់ពីគណៈកម្មាធិការកណ្តាល។
កិច្ចប្រជុំនេះមានរបៀបវារៈដូចខាងក្រោម៖
១- កិច្ចពិភាក្សាការកែសម្រួលសមាសភាព គណៈកិត្តិយសសាខា និងគណៈកម្មាធិការសាខា ដើម្បីបន្តអាណត្តិទី៥
(២០១៩-២០២៥)។
២- បញ្ហាផ្សេងៗ
ជាកិច្ចបញ្ចប់នៃកិច្ចប្រជុំ ឯកឧត្តម ប្រធានស្តីទី បានផ្តាំផ្ញើដល់ឯកឧត្តម លោកឧកញ៉ា សមាជិក សមាជិកា គណៈកម្មាធិការ និងមន្ត្រីក្រុមប្រតិបត្តសាខា សូមបន្តខិតខំប្រឹងប្រែងការងារ និងចូលរួមគ្រប់សកម្មភាពមនុស្សធម៌របស់សាខា ដើម្បីជួយដល់ជនរងគ្រោះដោយសារគ្រោះមហន្តរាយ និងគ្រួសារងាយរងគ្រោះ ក្នុងមូលដ្ឋានខេត្តព្រៃវែង៕
