នគរបាលប្រឆាំងគ្រឿងញៀន បញ្ជូនជនជាតិថៃ២នាក់ប្តីប្រពន្ធ ពាក់ព័ន្ធករណីរក្សាទុកនិងជួញដូរគ្រឿងញៀន៣ថង់ធំ ទៅសាលាដំបូងខេត្តចាត់ការតាមនីតិវិធី

ភ្នំពេញ៖ កម្លាំងនគរបាលការិយាល័យប្រឆាំងគ្រឿងញៀន នៅថ្ងៃទី០៣ ខែកញ្ញា ឆ្នាំ២០២៣ បានរៀបចំសំណុំរឿងបញ្ជូនជនសង្ស័យជាជនជាតិថៃ ២នាក់ប្តីប្រពន្ធ ពាក់ព័ន្ធករណីរក្សាទុក និងជួញដូរនូវសារធាតុញៀនខុសច្បាប់ រួមទាំងវត្ថុតាងទៅសាលាដំបូងខេត្តបន្ទាយមានជ័យ ដើម្បីចាត់ការតាមនីតិវិធីច្បាប់។

លោកវរសេនីយ៍ឯក សៅ សារឿន អធិការនគរបាលក្រុងប៉ោយប៉ែត បានឲ្យដឹងថា ដើម្បីភូមិ ឃុំ សង្កាត់ មានសុវត្ថិភាព លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានដាក់ចេញនូវបទបញ្ជាដល់គ្រប់អធិការនគរបាលក្រុង ស្រុក ត្រូវមានផែនការស៊ើបអង្កេតបទល្មើសគ្រឿងញៀន តាមវិធានការជំនាញឲ្យដូចជាភ្លៀងរលឹម។

ជាលទ្ធផលនៅវេលាម៉ោង៥ល្ងាច ថ្ងៃទី០១ ខែកញ្ញា ឆ្នាំ២០២៣ ក្រោយពីទទួលបានព័ត៌មានពីប្រជាពលរដ្ឋបានរាយការណ៍ថា នៅម្តុំភោជនីយដ្ឋាន ប៊ូសោភ័ណ ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ មានករណីរក្សាទុក និងជួញដូរនូវសាធាតុញៀខុសច្បាប់។

ដោយអនុវត្តតាមបទបញ្ជាលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ និងមានការសម្របសម្រួលពីលោក លឹម ប៊ុនសុភ័ក្រ ព្រះរាជអាជ្ញារងអមសាលាដំបូងខេត្តបន្ទាយមានជ័យ។

ភ្លាមៗនោះកម្លាំងនគរបាលផ្នែកប្រឆាំងគ្រឿងញៀន នៃអធិការដ្ឋាននគរបាលក្រុងប៉ោយប៉ែត បានចុះទៅឆែកឆេរ និងត្រួតពិនិត្យផ្ទះជនសង្ស័យ រកឃើញវត្ថុតាងម្សៅក្រាមពណ៌សថ្លា (Ice) សង្ស័យសារធាតុញៀនចំនួន៣ថង់ធំ មានទម្ងន់ ៣,០០៧.១២ក្រាម (៣ពាន់៧ចុច១២ក្រាមថ្លឹងសាច់ថ្នាំសុទ្ធ) ដាក់ក្នុងកាបូបស្ពាយពណ៌ខ្មៅ និងឃាត់ខ្លួនជនសង្ស័យជាជនជាតិថៃ ២នាក់ប្តីប្រពន្ធ ១/-ឈ្មោះ ស៊ូចាត រាម៉ា ភេទប្រុសអាយុ៤២ឆ្នាំ ជាប្តី និងប្រពន្ធឈ្មោះ ណាក់ដា រ៉ាម៉ាន អាយុ ៣៨ឆ្នាំ ដែលបានមកជួលផ្ទះនៅម្តុំភោជនីយដ្ឋាន ប៊ូសោភ័ណ ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។

លោកឧត្តមសេនីយ៍ត្រី ធិន ស៊ិន ស្នងការរង ទទួលការងារប្រឆាំងបទល្មើសគ្រឿងញៀន បានបញ្ជាក់ថា តាមចម្លើយសារភាពរបស់ជនសង្ស័យទាំង២នាក់ប្តីប្រពន្ធ ពួកគេទើបតែមកស្នាក់នៅក្រុងប៉ោយប៉ែត កាលពីថ្ងៃទី២៨ ខែកញ្ញា ឆ្នាំ២០២៣ លុះថ្ងៃទី០១ ខែកញ្ញា ឆ្នាំ២០២៣ ក៏ត្រូវបានសមត្ថកិច្ចនគរបាលឃាត់ខ្លួន ជាមួយនឹងការរកឃើញវត្ថុតាងម្សៅក្រាមពណ៌សថ្លា (Ice) សង្ស័យសាធាតុញៀនចំនួន៣ថង់ធំ។

លោកឧត្តមសេនីយ៍ត្រី ស្នងការរងបានបញ្ជាក់បន្ថែមថា ជនសង្ស័យទាំង២នាក់ រួមទាំងវត្ថុតាង ត្រូវបានកម្លាំងនគរបាលការិយាល័យ ជំនាញប្រឆាំងគ្រឿងញៀន រៀបចំសំណុំរឿងបញ្ជូនទៅសាលាដំបូង ដើម្បីចាត់ការតាមនីតិវិធីហើយ ៕