ឧត្ដមសេនីយ៍ទោ សម សាមួន ដឹកនាំកិច្ចប្រជុំត្រួតពិនិត្យការអនុវត្តផែនការសកម្មភាពឆ្នាំ២០២៣ ឆមាសទី១និងកំណត់ទិសដៅការងារឆមាសទី២ របស់ស្នងការដ្ឋាននគរបាលខេត្តកំពង់ស្ពឺ

ភ្នំពេញ៖ លោកឧត្ដមសេនីយ៍ទោ សម សាមួន ស្នងការនគរបាលខេត្ដកំពង់ស្ពឺ នាព្រឹកថៃ្ងទី០៧ ខែសីហា ឆ្នាំ២០២៣ បានអញ្ជើញដឹកនាំកិច្ចប្រជុំត្រួតពិនិត្យផែនការសកម្មភាពឆ្នាំ២០២៣ ប្រចាំឆមាសទី១ រយៈពេល៦ខែដើមឆ្នាំ។ ដោយមានការចូលរួមពី លោក លោកស្រី ស្នងការរង ទទួលផែនការងារជំនាញទាំង១២ លោក ស្នងការរង ទទួលជំនួយដឹកនាំការិយាល័យ លោក លោកស្រី នាយ នាយរងការិយាល័យ លោក អធិការនគរបាលស្រុក ក្រុង ទាំង០៩ព្រមទាំងអស់លោក មន្រ្ដីនគរបាលចំណុះជាច្រើនរូបទៀត។

រយៈពេល០៦ខែដើមឆ្នាំ២០២៣ (ឆមាសទី១) ស្នងការដ្ឋាននគរបាលខេត្ដកំពង់ស្ពឺ បានចាត់តាំងការងារជំនាញយោងតាមផែនការលេខ ០០២/២៣ និងយោងតាមផែនការអគ្គស្នងការនគរបាលជាតិ និងមានការដឹកនាំចង្អុលការពី ឯកឧត្តម ប្រធានគណៈបញ្ជាការឯកភាពរដ្ឋបាលខេត្ដ នៅទូទាំងខេត្តកំពង់ស្ពឺ ជាលទ្ធផលបទល្មើសគ្រប់ប្រភេទត្រូវបានកាត់បន្ថយ ក្នុងនោះមានបទល្មើសព្រហ្មទណ្ឌ គ្រឿងញៀន និងបទល្មើសមួយចំនួនទៀត។ ជាការកត់សម្គាល់ក្មេងទំនើងនៅក្នុងខេត្តកំពង់ស្ពឺ ត្រូវបានចងក្រងបញ្ជីគ្រប់គ្រងដោយបានការចូលរួមសហការពីអាជ្ញាធរមូលដ្ឋាន លោកគ្រូ អ្នកគ្រូនៅតាមគ្រឹះស្ថានឯកជន សាលារៀនរដ្ឋ។ ល។ ពាក់ព័ន្ធការអនុវត្តគោលនយោបាយភូមិឃុំសង្កាត់មានសុវត្ថិភាព នៅតែជាជ្រុងមួយដ៏មានប្រសិទ្ធភាពនិងស័ក្កិសិទ្ធិ។

ជាចុងក្រោយលោកឧត្ដមសេនីយ៍ទោ ស្នងការ បានធ្វើការវាយតម្លៃខ្ពស់ចំពោះកិច្ចខិតខំប្រឹងប្រែងរបស់កងកម្លាំងនគរបាល និងកងកម្លាំងប្រដាប់អាវុធ អាជ្ញាធរដែនដីគ្រប់លំដាប់ថ្នាក់ រួមទាំងអាណាព្យាបាល លោកគ្រូ អ្នកគ្រូ ដែលបានចូលរួមជម្រុញលើការងារអនុវត្ដវិធានការនានា លើកិច្ចសហការទើបទទួលបានលទ្ធផលល្អដូចពេលនេះជាថ្មីម្ដងទៀត សំណូមពរដល់បងប្អូនប្រជាពលរដ្ឋចូលរួមគោរពច្បាប់ និងសហការរាយការណ៍ ជូនមកសមត្ថកិច្ចអោយបានទាន់ពេលវេលាទើបការចំណាត់ការមានប្រសិទ្ធភាពកាន់តែប្រសើរ ៕