រុស្ស៊ីបានអះអាងថា ខ្លួនបានបាញ់ទម្លាក់ និងស្ទាក់ចាប់យន្តហោះគ្មានមនុស្សបើករបស់អ៊ុយក្រែនជាច្រើនគ្រឿង
បរទេស៖ រុស្ស៊ីបានអះអាងថា ខ្លួនបានបាញ់ទម្លាក់ និងស្ទាក់ចាប់យន្តហោះគ្មានមនុស្សបើករបស់អ៊ុយក្រែនជាច្រើនគ្រឿង ដែលហោះពីលើទីក្រុងមូស្គូ ក្នុងអ្វីដែលខ្លួនបានពិពណ៌នាថាជា ការវាយប្រហារភេរវកម្ម។
ក្រសួងការពារជាតិរុស្ស៊ីបានឲ្យដឹងនៅក្នុងសេចក្តីថ្លែងការណ៍មួយថា យន្តហោះគ្មានមនុស្សបើកចំនួន ៤ គ្រឿងត្រូវបានបំផ្លាញដោយប្រព័ន្ធការពារដែនអាកាស ហើយទី ៥ ត្រូវបានស្ទាក់ចាប់ និងធ្លាក់។
ក្រសួងការពារជាតិរុស្ស៊ីបានបន្តថាគ្មានអ្នករងរបួសឬការខូចខាតជាលទ្ធផលនៃការវាយប្រហារភេរវជននោះទេ។
យ៉ាងហោចណាស់យន្តហោះគ្មានមនុស្សបើកចំនួនបីគ្រឿងត្រូវបានស្ទាក់ចាប់នៅលើតំបន់មូស្គូ ដែលរួមមានពីរគ្រឿងដែលមានចម្ងាយត្រឹមតែ ៣០ គីឡូម៉ែត្រ (១៩ ម៉ាយ) ភាគនិរតីនៃវិមានក្រឹមឡាំង។
យោងតាមទីភ្នាក់ងារសារព័ត៌មានរុស្ស៊ី RIA បានឱ្យដឹងថា ដ្រូនមួយគ្រឿងត្រូវបានគេរកឃើញនៅក្នុងតំបន់ជិតខាងនៃ Kaluga ហើយមួយទៀតត្រូវបានបាញ់ទម្លាក់នៅក្នុងទីក្រុង Kubinka។
យន្តហោះគ្មានមនុស្សបើកទី៥ បានកកស្ទះ និងធ្លាក់នៅក្នុងស្រុក Odintsovo ជាយក្រុងនៅភាគខាងលិចនៃទីក្រុងមូស្គូ។
ទីភ្នាក់ងារសារព័ត៌មានបានរាយការណ៍ថា ជាលទ្ធផល ជើងហោះហើរចេញ និងចូលជាច្រើនត្រូវបានរំខាននៅអាកាសយានដ្ឋាន Vnukovo នៃទីក្រុងម៉ូស្គូ។
ជើងហោះហើរពីរុស្ស៊ី ទួរគី អារ៉ាប់រួម និងអេហ្ស៊ីប ត្រូវបានបង្វែរទៅអាកាសយានដ្ឋានផ្សេងទៀតក្នុងទីក្រុង។
ការផ្សាយពាណិជ្ជកម្ម អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បានឲ្យដឹងថា ការប៉ុនប៉ងរបស់របប Kyiv ដើម្បីវាយប្រហារតំបន់ដែលមានហេដ្ឋារចនាសម្ព័ន្ធស៊ីវិលស្ថិតនៅ រួមទាំងអាកាសយានដ្ឋាន ដែលទទួលជើងហោះហើរបរទេសដោយចៃដន្យ គឺជាអំពើភេរវកម្មមួយផ្សេងទៀត។
សហគមន៍អន្តរជាតិគួរតែដឹងថា សហរដ្ឋអាមេរិក អង់គ្លេស បារាំង ដែលជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ កំពុងផ្តល់ហិរញ្ញប្បទានដល់របបភេរវករ។
មិនមានការអត្ថាធិប្បាយភ្លាមៗពីទីក្រុង Kyiv ទេ។
ទីក្រុងមូស្គូក៏បានស្តីបន្ទោសអ៊ុយក្រែនចំពោះការវាយប្រហារដោយយន្តហោះគ្មានមនុស្សបើកមួយទៀតលើរដ្ឋធានីកាលពីខែឧសភា។
ក្រសួងការពារជាតិរុស្ស៊ីបានឲ្យដឹងថា យន្តហោះគ្មានមនុស្សបើកចំនួន ៨ គ្រឿងបានចូលរួមក្នុងសកម្មភាពភេរវករ ហើយទាំងអស់ត្រូវបានបាញ់ទម្លាក់ ដោយបីគ្រឿងត្រូវបានបង្វែរទិសដៅដោយសារតែសង្គ្រាមអេឡិចត្រូនិក។
ថ្លែងតាមទូរទស្សន៍នាពេលនោះ ប្រធានាធិបតីរុស្សុី លោក វ្ល៉ាឌីមៀ ពូទីន បានអះអាងថា ការវាយប្រហារនេះគឺសំដៅទៅលើគោលដៅស៊ីវិល ហើយបានសន្យាថានឹងធ្វើឱ្យប្រសើរឡើងនូវការការពារដែនអាកាស។
ប្រជាជនរុស្ស៊ីរួបរួមគ្នាជាងពេលណាៗទាំងអស់។
ការវាយប្រហារដែលត្រូវបានគេចោទប្រកាន់នេះគឺជាលើកដំបូងនៅលើរដ្ឋធានីរុស្ស៊ីចាប់តាំងពីការបះបោរប្រដាប់អាវុធដោយមេដឹកនាំក្រុមទាហានសុីឈ្នួល Wagner លោក Yevgeny Prigozhin នៅថ្ងៃទី២៤ ខែមិថុនា។
នៅក្នុងបញ្ហាប្រឈមដ៏ធំបំផុតចំពោះការគ្រប់គ្រងរយៈពេល ២ ទសវត្សរ៍របស់ប្រធានាធិបតីរុស្សុី ក្រុមទាហានសុីឈ្នួល Wagner បានដើរឆ្ពោះទៅទីក្រុងមូស្គូ ដោយទាមទារឱ្យមានការបណ្តេញថ្នាក់ដឹកនាំយោធារបស់រុស្ស៊ី ដោយចោទប្រកាន់ពួកគេពីបទបង្កជម្លោះក្នុងសង្គ្រាមនៅអ៊ុយក្រែន។
ការបះបោរបានបញ្ចប់បន្ទាប់ពីកិច្ចព្រមព្រៀងអន្តរការីរបស់បេឡារុស្សរវាងវិមានក្រឹមឡាំង និងមេដឹកនាំក្រុមទាហានសុីឈ្នួល Wagner។
កាលពីថ្ងៃអង្គារ ប្រធានាធិបតីរុស្សុី លោក វ្ល៉ាឌីមៀ ពូទីន បានថ្លែងអំណរគុណដល់សមាជិកនៃអង្គការសហប្រតិបត្តិការសៀងហៃ (SCO) សម្រាប់សកម្មភាពគាំទ្ររបស់ពួកគេ ដើម្បីការពារសណ្តាប់ធ្នាប់រដ្ឋធម្មនុញ្ញរបស់រុស្ស៊ី ក្នុងអំឡុងពេលនៃការបះបោររបស់ក្រុមទាហានសុីឈ្នួល Wagner នេះបើយោងតាមទីភ្នាក់ងារសារព័ត៌មានរដ្ឋរុស្ស៊ី RIA។
ថ្លែងនៅក្នុងសន្និសិទនិម្មិតនៃក្រុមសន្តិសុខ ដែលត្រូវបានបង្កើតឡើងដោយរុស្ស៊ី និងចិន និងរួមបញ្ចូលកាហ្សាក់ស្ថាន កៀហ្ស៊ីស៊ីស្ថាន តាជីគីស្ថាន និងអ៊ូសបេគីស្ថាន ប្រធានាធិបតីរុស្សុី លោក វ្ល៉ាឌីមៀ ពូទីន បានប្រាប់មេដឹកនាំអាស៊ីថា ប្រជាជនរុស្ស៊ីមានសាមគ្គីភាពជាងពេលណាទាំងអស់។
លោកបានបន្តថា ប្រជាជនរុស្ស៊ីត្រូវបានរួបរួមគ្នាមិនដែលមានពីមុនមកទេ។
មជ្ឈដ្ឋាននយោបាយរុស្ស៊ី និងសង្គមទាំងមូលបានបង្ហាញយ៉ាងច្បាស់នូវការរួបរួមរបស់ពួកគេ និងបង្កើនស្មារតីទទួលខុសត្រូវចំពោះជោគវាសនានៃមាតុភូមិ នៅពេលដែលពួកគេឆ្លើយតបជារណសិរ្សរួបរួមប្រឆាំងនឹងការប៉ុនប៉ងបះបោរដោយប្រដាប់អាវុធ។
លោកបានបន្ថែមថា ទីក្រុងមូស្គូមានគម្រោងជំរុញទំនាក់ទំនងជាមួយ SCO ហើយថារុស្ស៊ីនឹងក្រោកឈរប្រឆាំងនឹងទណ្ឌកម្មរបស់លោកខាងលិច និងការបង្កហេតុ។
ទន្ទឹមនឹងនេះ រុស្ស៊ីបានបន្តការវាយប្រហារដោយមីស៊ីល និងដ្រូននៅអ៊ុយក្រែន។
មនុស្សចំនួន ៣ នាក់ត្រូវបានបញ្ជាក់ថាបានស្លាប់ និង ២១ នាក់ផ្សេងទៀតបានរងរបួសបន្ទាប់ពីការវាយប្រហារដោយយន្តហោះគ្មានមនុស្សបើកនៅក្នុងទីក្រុង Sumy ភាគឦសានដែលបានបំផ្លាញអគារផ្ទះល្វែងចំនួនពីរកាលពីថ្ងៃចន្ទ។
ប្រធានាធិបតីអ៊ុយក្រែន លោក Volodymyr Zelenskyy បានឲ្យដឹងថា ការវាយប្រហារក៏បានធ្វើឱ្យខូចខាតដល់ទីស្នាក់ការកណ្តាលក្នុងតំបន់នៃសេវាសន្តិសុខអ៊ុយក្រែន ដែលជាទីភ្នាក់ងារចារកម្មសំខាន់របស់ប្រទេសនេះ។
លោកបានជំរុញឲ្យសម្ព័ន្ធមិត្តលោកខាងលិចបង្កើនការផ្គត់ផ្គង់ប្រព័ន្ធការពារដែនអាកាសដើម្បីជួយការពារការវាយឆ្មក់របស់រុស្ស៊ី។
ប្រភព៖ Sky News
ប្រែសម្រួលដោយ៖ [ឡាយ លីហួ]
