អភិបាលខេត្តបាត់ដំបង ដឹកនាំកិច្ចប្រជុំពិភាក្សាការងារស្ដីពី ដំណោះស្រាយផ្អែកលើធម្មជាតិ (Nbs) សម្រាប់ការវិនិយោគដែលមានភាពបត់បែនជាមួយអាកាសធាតុនៅក្នុងសហគមន៍ បរិស្ថាន និងសេដ្ឋកិច្ចនៅក្នុងតំបន់ទន្លេមេគង្គ

ភ្នំពេញ៖ ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង នាព្រឹកថ្ងៃព្រហស្បតិ៍ ៥រោច ខែជេស្ឋ ឆ្នាំថោះ បញ្ចស័ក ព.ស២៥៦៧ ត្រូវនឹងថ្ងៃទី៨ ខែមិថុនា ឆ្នាំ២០២៣ បានអញ្ជើញជាអធិបតីក្នុងកិច្ចប្រជុំពិភាក្សាការងារស្ដីពី ដំណោះស្រាយផ្អែកលើធម្មជាតិ (Nbs) សម្រាប់ការវិនិយោគដែលមានភាពបត់បែនជាមួយអាកាសធាតុនៅក្នុងសហគមន៍ បរិស្ថាន និងសេដ្ឋកិច្ចនៅក្នុងតំបន់ទន្លេមេគង្គ រវាងរដ្ឋបាលខេត្តបាត់ដំបង ជាមួយនិង ក្រុមការងារសិក្សាស្រាវជ្រាវ នៃមជ្ឈមណ្ឌលអន្តរជាតិសម្រាប់ការគ្រប់គ្រងបរិស្ថាន (ICEM)។

គោលបំណងចម្បងរបស់ Nbs នៅក្នុងខេត្តបាត់ដំបង បានជ្រើសរើសបឹងរ៉ាស្ថិតនៅក្នុងតំបនើស្ថានីយរថភ្លើងដែលចាត់ទុកជាតំបន់ដីសើម ក្នុងនោះមានមុខងារជាអាងស្ដុកទឹកសម្រាប់ទឹកជំនន់ក្នុងតំបន់ និងកន្លែងស្ដុកទឹកសង្រ្គោះបន្ទាន់សម្រាប់ទឹកហូរចេញពីស្ទឹងសង្កែ ហើយក៏ចូលរួមក្នុងការកែលំអគុណភាពទឹកដែលបានប្រើប្រាស់នៅតាមផ្ទះ និងជំនន់ទឹកភ្លៀង ដោយប្រើដំណោះស្រាយធម្មជាតិ រួមបញ្ជូលទាំងការបង្កើតឧទ្យានទីក្រុងសម្រាប់ការរស់នៅ ជីវចម្រុះ ទេសចរណ៍ធម្មជាតិ និងសោភ័ណភាព ហើយមិនត្រឹមតែប៉ុណ្ណោះកែប្រែស្ថានីយរថភ្លើងចាស់ទៅជាកន្លែងទេសចរណ៍តាមរយៈការលាយបញ្ចូលគ្នានៃគម្រោងNbsនេះ។

ក្នុងនោះដែរ ឯកឧត្តម សុខ លូ អភិបាលខេត្ត បានសម្ដែងនូវការសប្បាយរីករាយចំពោះក្រុមការងារ ដែលចង់សិក្សាអនុវត្តនៃគម្រោងនេះ បើទោះបីជាមិនទាន់មានថវិកាគ្រប់គ្រាន់សម្រាប់ធ្វើការអនុវត្តគម្រោងនេះ ក៏ដោយ ប៉ុន្តែត្រូវធ្វើការសិក្សាស្រាវជ្រាវឱ្យបានជាមុនសិន ហើយប្រសិនជាថ្ងៃទៅមុខទៀត យើងមានថវិកាគ្រប់គ្រាន់ គឺយើងនឹងធ្វើការអនុវត្តគម្រោងនេះតែម្ដង។ ឯកឧត្តមអភិបាលខេត្ត បានបន្តទៀតថា សម្រាប់គម្រោងនេះផងដែរ ក៏ជាអ្វីដែលរដ្ឋបាលខេត្តក៏កំពុងធ្វើការសិក្សាស្រាវជ្រាវផងដែរ ព្រោះជាតម្រូវការចាំបាច់របស់ប្រជាពលរដ្ឋដែលកំពុងត្រូវការ ដោយសារតែបញ្ហាកំណើនយ៉ាងឆាប់រហ័សរបស់ប្រជាពលរដ្ឋ ៕