ក្រសួងបរិស្ថាន រៀបចំវគ្គបណ្តុះបណ្តាលស្តីពី ការបង្ការនិងការឆ្លើយតបទៅនឹងការកេងប្រវ័ញ្ច និងការរំលោភបំពានផ្លូវភេទ

ភ្នំពេញ៖ នាយកដ្ឋានប្រែប្រួលអាកាសធាតុ នៃអគ្គនាយកដ្ឋានគោលនយោបាយនិងយុទ្ធសាស្រ្ត ក្រសួងបរិស្ថាន ក្រោមកិច្ចសហការជាមួយ កម្មវិធីអភិវឌ្ឍន៍សហប្រជាជាតិ (UNDP) បានរៀបចំវគ្គ បណ្តុះបណ្តាល ស្តីពីការបង្ការ និងការឆ្លើយតបទៅនឹងការកេងប្រវ័ញ្ច និងការរំលោភបំពានផ្លូវភេទ វគ្គបណ្តុះបណ្តាលនេះស្ថិតក្រោមអធិបតីភាព លោកជំទាវ ព្រំ សុភី អនុរដ្ឋលេខាធិការក្រសួងបរិស្ថាន និងលោកស្រី Alissar Chaker តំណាងUNDP ប្រចាំប្រទេសកម្ពុជា និងកម្មវិធី CCCA3 ជាច្រើនរូប។

លោកស្រី Alissar Chaker បានលើកឡើងអំពីផលប៉ះពាល់នានាបណ្តាលមកពី ការកេងប្រវ័ញ្ច និងការរំលោភបំពានផ្លូវភេទ ចំពោះបញ្ហាផ្លូវចិត្តរបស់បុគ្គល ស្ថាប័ន និងផលិតភាពការងារ ជាដើម ហើយUNDP គាំទ្រ និងប្រកាន់ខ្ជាប់នូវគោលការណ៍លុបបំបាត់សកម្មភាពកេងប្រវ័ញ្ច និងការរំលោភបំពានផ្លូវភេទគ្រប់រូបភាព ជាពិសេសសម្រាប់ដៃគូនានារបស់ UNDP តាមរយៈការជំរុញសកម្មភាពផ្សព្វផ្សាយ និងវគ្គបណ្តុះបណ្តាលដើម្បីលើកកម្ពស់ចំណេះដឹងជាប្រចាំ អំពីបញ្ហានេះ។

ក្នុងឱកាសនោះលោកជំទាវ ព្រំ សូភី បានលើកឡើងថាក្រសួងបរិស្ថានយកចិត្តទុកដាក់ក្នុងការជំរុញការចូលរួមដោយស្មើភាពរវាងបុរស និងស្រ្តីចាប់ពីថ្នាក់ជាតិរហូតដល់ថ្នាក់ក្រោមជាតិ តាមរយៈផែនការ យុទ្ធសាស្រ្តបញ្រ្ជាបយេនឌ័រក្នុងវិស័យបរិស្ថាន ២០២១-២០២៥ ដោយផ្តោតលើយុទ្ធសាស្រ្តចំនួន៣ គឺ (១) ការលើកកម្ពស់សមត្ថភាពស្ថាប័ន (២) ការបង្កើនការយល់ដឹងរបស់អ្នកពាក់ព័ន្ធ ជាពិសេសស្រ្តី កុមារ សហគមន៍មូលដ្ឋាន មន្រ្តីឧទ្យាននុរក្សអំពីសិទ្ធ និងសមភាពយេនឌ័រ (៣) ការបង្កើនកិច្ចសហប្រតិបត្តិការ នានាក្នុងការចូលរួមរបស់អ្នកពាក់ព័ន្ធ។

លោកជំទាវ ព្រំ សុភី បានសង្កត់ធ្ងន់ថា ដោយសារប្រទេសជាតិ មានសុខសន្តិភាព និងការអភិវឌ្ឍទើប យើងអាចមានឱកាសក្នុងការយកចិត្តទុកដាក់លើបញ្ហាយេឌ័រ ការលើកកម្ពស់សិទ្ធ ការលុបបំបាត់ការរើសអើង និងការបៀតបបៀនគ្រប់រូបភាព។

លោកជំទាវស្នើឱ្យ UNDP ពង្រីកការគាំទ្រលើការបណ្តុះបណ្តាលនេះបន្ថែមទៀតចំពោះមន្រ្តីថ្នាក់ជាតិ ថ្នាក់ក្រោមជាតិ ជាពិសេសជនងាយរងគ្រោះ នៅតំបន់ការពារធម្មជាតិនានា។
វគ្គបណ្តុះបណ្តាលនេះ មានគោលបំណង ដើម្បី លើកកម្ពស់ការយល់ដឹង និងបង្ហាញអំពីយន្ត ការពាក់ព័ន្ធនានាក្នុងការបង្ការការកេងប្រវ័ញ្ច និងការរំលោភ បំពានផ្លូវភេទ សម្រាប់មន្រ្តីនាយកដ្ឋាន ប្រែប្រួលអាកាសធាតុ UNDP CCCA3 និងអ្នកពាក់ព័ន្ធ៕