ឯកឧត្តម ជាប ដាវុធ ដឹកនាំក្រុមការងាររៀបចំ ពិធីជួបជុំសំណេះសំណាល លើកទឹកចិត្តដល់លោកគ្រូ អ្នកគ្រូបង្រៀនថ្នាក់ទី១២ នៃវិទ្យាល័យ៣ ក្នុងស្រុកល្វាឯម

ភ្នំពេញ៖ ឯកឧត្តម ជាប ដាវុធ សមាជិកគណៈកម្មាធិការកណ្តាល ជាប្រធានផ្នែកហិរញ្ញវត្ថុ នៃយុវជនគណបក្សថ្នាក់កណ្តាល និងជាអនុប្រធានក្រុមការងារគណបក្សចុះមូលដ្ឋានស្រុកល្វា ទទួលបន្ទុកចលនាយុវជនគណបក្សចុះមូលដ្ឋានស្រុកល្វាឯម ខេត្តកណ្តាល ដឹកនាំក្រុមការងាររៀបចំពិធីជួបជុំសំណេះសំណាល លើកទឹកចិត្តដល់លោកគ្រូ អ្នកគ្រូបង្រៀនថ្នាក់ទី១២ នៃវិទ្យាល័យ៣ រួមមាន៖ វិទ្យាល័យ ហ៊ុន សែន ល្វាសរ, វិទ្យាល័យ ហ៊ុន សែន ទឹកឃ្លាំង និងវិទ្យាល័យ ហ៊ុន សែន ពាមឧកញ៉ាអុង ដើម្បីបំពាក់បំប៉នដល់សិស្សានុសិស្សក្រៅម៉ោងសិក្សាបន្ថែម សម្រាប់ត្រៀមលក្ខណៈប្រឡងសញ្ញាបត្រទុតិយភូមិនាពេលខាងមុខ។

ឯកឧត្តម ជាប ដាវុធ បានលើកឡើងក្នុងពិធីសំណេះសំណាលជាមួយសិស្សានុសិស្សថ្នាក់ទី១២ នៅតាមវិទ្យាល័យចំនួន ៣ ក្នុងស្រុកល្វាឯម នៅថ្ងៃទី២០ ខែតុលា ឆ្នាំ២០២២ថា ក្រោមការដឹកនាំប្រកបដោយកិត្តិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រី បានធ្វើឲ្យប្រទេសជាតិមានការអភិវឌ្ឍន៍រីកចំរើនលើគ្រប់វិស័យ ក្នុងនោះ នៅក្នុងយុទ្ធសាស្ត្រចតុកោណដំណាក់កាលទី៣ អាណត្តិទី៥ នៃរដ្ឋសភា រាជរដ្ឋាភិបាលបានធ្វើកំណែទម្រង់យ៉ាងស៊ីជម្រៅទៅលើវិស័យអប់រំ និងវិស័យសំខាន់ៗ ដោយរាជរដ្ឋាភិបាលបានចំណាយថវិការដ៏ច្រើនសន្ធឹកសន្ធាប់ ដើម្បីលើកកម្ពស់គុណភាពវិស័យអប់រំ និងការបណ្តុះបណ្តាលជំនាញជីវៈ និងបច្ចេកទេសគ្រប់កម្រិត ដើម្បីឆ្លើយតបការងារទៅនិងតម្រូវការទីផ្សារ។

ឯកឧត្តម បន្តថា ការសិក្សារៀនសូត្រ មិនត្រឹមតែត្រូវអនុវត្តបន្តពេញមួយជីវិតប៉ុណ្ណោះទេ ប៉ុន្តែវាជាការងារមួយតម្រូវឲ្យមានការលើកកម្ពស់ និងអភិវឌ្ឍន៍គ្មានទីបញ្ចប់ ដើម្បីផលិតនូវធនធានមនុស្សប្រកបដោយគុណភាព មានសក្តានុពលសម្រាប់ការអភិវឌ្ឍន៍សង្គមជាតិ ឲ្យមានការរីកចំរើន ភាពសុខដុម និងប្រកបដោយចីរភាព ដូច្នេះការអបរំត្រូវតែឆ្លើយតបទៅនឹងទីផ្សារពលកម្ម និងមានដំណើរការឆ្លើយតបទៅនឹងបរិការណ៍ នៃសកលភាវូបនីយកម្ម។

ដើម្បីចូលរួមអភិវឌ្ឍន៍ធនធានមនុស្ស ស្របតាមចក្ខុវិស័យរបស់រាជរដ្ឋាភិបាល ឯកឧត្តម ជាប ដាវុធ បានលើកទឹកចិត្តដល់លោកគ្រូអ្នកគ្រូបង្រៀនថ្នាក់ទី១២ នៃវិទ្យាល័យទាំង៣រួមមាន៖ វិទ្យាល័យ ហ៊ុន សែន ល្វាសរ, វិទ្យាល័យ ហ៊ុន សែន ទឹកឃ្លាំង និងវិទ្យាល័យ ហ៊ុន សែន ពាមឧកញ៉ាអុង នូវថវិការសរុបប្រមាណ ៥ ០០០ ដុល្លារអាម៉េរិក សម្រាប់បំពាក់បំប៉នដល់សិស្សានុសិស្សក្រៅម៉ោងសិក្សាបន្ថែម ដើម្បីត្រៀមលក្ខណៈប្រឡងសញ្ញាបត្រទុតិយភូមិនាពេលខាងមុខ និងបានឧបត្ថម្ភជូននាយកគ្រប់គ្រងនៅតាមវិទ្យាល័យទាំង៣ ដោយក្នុងម្នាក់ៗទទួលបានថវិកា ១០០,០០០រៀល, លោកគ្រូ អ្នកគ្រូ ម្នាក់ ៥០,០០០រៀល, យុវជន សសយក ក្នុងម្នាក់ ៣០,០០០រៀល និងជួយដាក់កង្ហានៅវិទ្យាល័យ ហ៊ុន សែន ល្វាសរ ចំនួន ១០ និងអំពូលភ្លើង និងឧបត្ថម្ភដល់សិស្សគ្រោះថ្នាក់ចរាចរ ចំនួន ២,០០០,០០០រៀល៕